قرري .. نظمي .. غيري .. مش هتندمي

1) اتصالحي مع نفسك وسامحي نفسك على اي تقصير في حق نفسك او موقف معرفتيش تاخدي حقك فيه او حلم اتنازلتي عنه ، قولي لنفسك انك هتعرفي تصالحي نفسك وتصلحيها في نفس الوقت وتعوضيها عن اي عمر عدى عايشاه مقصره في حق نفسك
2) حددي عيوبك ومميزاتك بالورقه والقلم مش في دماغك ، اكتبي مميزاتك حتى لو كانت انك بتعرفي تعملي اكله حلوه او بتعرفي تتكلمي بلباقه وتقنعي الناس .
3) شوفي ايه اللي ممكن تعمليه لتصليح عيوبك وزيادة مميزاتك ، محتاجه دكتور روحي محتاجه استشارات اسألي ، محتاجه معلومات ادخلي على الانترنت شوفي رأي اللي سبقوكي في البحث عن حلول لنفس مشاكلك
4) اكتبي اسامي كل اللي قادره تفتكريهم من اللي بتتعاملي معاهم وفكري في احسن صفه في كل حد واوحش صفه في كل حد منهم وشوفي فيكي صفات منها واللا لا ، حاولي تاخدي من كل واحد احسن صفه فيه وتبقى فيكي وتبعدي عن كل صفه وحشه فيهم
5) اصحي الفجر حاولي تصلي ركعتين قبله وتدعي لنفسك احسن دعاء (اللهم انك عفو غفور حليم عظيم تحب العفو فاعفو عني ، اللهم اصلح لي شأني كله ولا تكلني الى نفسي طرفة عين) ، صلي الفجر واقرأي الاذكار او شغليها على موبايلك واقرأي معاها بصوت مشاري العفاسي
6) افتحي شباكك او بلكونتك مع الشروق وشمي هوا الفجر وشوفي السما السوداء وهي بتنور بعد الظلمه وتفائلي بالله خير ، زي ما نور الشمس بيطرد الظلام والسواد ربنا قادر يحول حياتك لنور على نور
7) هاتي الورقه والقلم بتوعك ، اكتبي بتحلمي بإيه ومهما كان اللي نفسك فيه بكل تفاصيله وحتى لو كان تغيير لون ستاير بيتك اكتبيه ، احلمي على الورق واكتبي ، بعد ما تكتبي اقفلي الورق ده وروحي اعملي حاجه تشربيها ويا ريت بلاش شاي ، اشربي ينسون او نعناع او شاي اخضر او سيكم للبرد او للكحه مفيده وطعمها كويس .
8) شربتي بالراحه وادام الهوا والشمس ؟ ، هاتي الورق اللي كتبتيه ، قسمي احلامك اللي كتبتيها ، احلام قصيرة المدى ممكن تتحق بسرعه واحلام بعيدة المدى محتاجه وقت ويمكن سنين ، ابدأي شوفي علشان تعملي الحلم الكبير محتاجه تغيري ايه دلوقتي واكتبي خطواتك مثلاً نفسك تغيري شغلك ، خطواتك هتتعلمي حاجه جديده تكوني بتحبيها وتاخدي فيها كورسات وحددي هتاخديها فين وبكام وتجيبي فلوسها ازاي كمان ، حددي الاحلام السريعه في نقاط وخطوات هي كمان
9) شوفي ايه المهمات اللي بتبقى مطلوبه منك يومياً واكتبيها بالساعات في صفحة متقسمه 24 مربع كل مربع لساعه من ساعات اليوم ، شوفي كل مهمه بتاخد من وقتك كام مربع حاولي تحجميها وتقللي وقتها يا ريتك تقدري تخليها نص مربع (يعني نص ساعه) او حتى ربع ، مثلاً بتجهزي الغدا في ساعه خليها نص ساعه وهشرحلك ازاي بعدين في بوست تاني قريب جداً ، شوفي وقتك اللي فيه فراغ حطي في نص الفراغ حاجه جديده تتعلميها وحطي في نص الفراغ التاني خطوة من خطوات تصليح بيتك علشان حالتك النفسيه تتحسن ، غيري نظام البيت والوانه لو تقدري
10) حطي اولوياتك تنظيم كل حاجه ولو حتى طريقة رص الادوات في المطبخ خليها بالطريقه اللي توفرلك وقت ومجهود ، غيري ترتيب حياتك ، انتي لما شنطتك بتبقى مش مترتبه بتتخنقي وتضيعي وقت في التفتيش على كل حاجه عايزاها وهي ادامك ومش شايفاها ، بيتك وشغلك وهدومك وحتى علب الادوية كل حاجه مكركبه بتمثل عبء وضغط نفسي وتضييع وقت اللي هو عمرنا ، رتبي ونظمي كل حاجه حتى لو احتجتي شهر ترتيب هتوفري بسبب الشهر ده سنين بعد كده صدقيني وهتستمتعي بحياتك بجد بعدها وهتدعيلي
11) خففي فرش بيتك خليه زي الشاليهات والمصايف واي حاجه مش بتستخدميها اوعي تحتفظي بيها مهما كنتي بتحبيها ، خرجيها لله واكسبي ثواب الاحسان والبر لن تنالوا البر حتى تنفقوا مما تحبون ، واستفيدي انك بتبعدي الطاقه السلبيه اللي بتيجي في البيت من الحاجات المركونه والكراكيب
12) اعملي ورقه بالروتين اليومي اللي تحافظي بيه على ترطيب بشرتك وشعرك وجسمك ولو نص ساعه في اليوم ومتقوليليش مفيش وقت ، اخترعي وقت ان شاء الله الساعه 5 الفجر ونفذيها بحذافيرها كل يوم
13) اشربي مياه كتير وكلي فاكهة طازجه تفاح او موز او عنب او برتقال او رمان اي فواكه وخضراوات نيئه خيار جزر كابوتشي ويا ريت تمر بالحليب او حتى 7 تمرات لوحدهم الصبح بيمنع الحسد والمس واي شر لانه بيعمل هاله زرقاء من اشعاعات ايجابيه حوالين جسمك فعلاً وده ثبت علمياً غير قيمته لجسمك وللمخ والتركيز
14) خللي اساسي يوم او يومين بروتين نباتي في الاسبوع يعني عدس او فول او فاصوليا او لوبيا او مشروم ، ويومين بروتين اسماك تونه او مشوي او صينيه في الفرن وابعدي عن المقلي ، ويوم واحد في الاسبوع لحوم حمراء ومتزوديش عن 100 جرام ويوم واحد لحوم فراخ وبرضه متزوديش عن 100 جرام ، كده عندك يوم فاضي ريحي معدتك من البروتين واكتفي بالحليب الصبح او الزبادي والفواكه والخضراوات الطازجه
15) افطري كويس اوي واتغدي معقول ونامي من غير عشاء او على رايب او زبادي
16) وقفي استخدام الاطباق البلاستيك بالذات مع اي اكل سخن او فيه ليمون
17) وقفي مرقة الدجاج والشيبسي والعصاير الملونه وكل الحاجات اللي بتستهلكيها وانتي مش عارفه مصدرها ، ركزي اوي في اكلك وشربك ، انتي روح وجسم وعقل ، الروح علاجها الفجر والشروق والعقل علاجه الترتيب والتنظيم والكتابه بالمنطق وبالخطوات والجسم علاجه في الاكل والشرب والروائح
18) استخدمي عطور من الزيوت الطبيعية العطريه فانيليا وليمون وبرتقال وغيرها هتحسن حالتك النفسيه جداً وتنشط الذهن
19) كل ما تحققي خطوه في اي حلم روحي على مكانه في الورق اللي كاتباه وعلمي جنبه صح بخط واضح ولون مميز وافرحي بانجازك ، لو كان حلم من احلامك تخلصي ترتيب البيت واجزاء الحلم ده اوضه اوضه ومطبخ وحمام بكل تفصيله فيهم ولو كان تغيير مكان كرسي اكتبيه وعلمي عليه لما تعمليه هيديلك دفعه ممتازه انك تكملي وتخلصي كل اللي وراكي
20) كل الناس عندهم 24 ساعه ومنهم ناس ناجحه جداً وناس فاشله جداً الناجحين جداً عارفين ينظموا يومهم ووقتهم ويستفيدوا منه والفاشلين عمرهم رايح في الهرجله
فوقي لنفسك ونظمي حياتك ولو فاضل لك يوم واحد عيشيه كويس هتحسي انه عمرك كله هو اليوم ده ، صلحي حياتك ولو عمرك 80 سنه يمكن تعيشي لغاية 100 ويمكن 81 سنه بس ويمكن 80 سنه وشهر بس الشهر ده بعد التنظيم هيبقى احسن من عمرك في ال80 سنه كلهم ..